Útikennsla

Það er hollt og gott fyrir barnið að fá að vera í nánum tengslum við náttúruna og fá frískt loft og góða hreyfingu. Með því að vera úti í náttúrinni læra börn um aðrar lífverur, hvaðan maturinn komi og að lífsafkoma okkar sé háð náttúrunni. Það er mikilvægt að börn fái og upplifi tengsl við náttúruna og læri að virða hana því að í framtíðinni hlítur það að hafa áhrif á hvernig ákvarðanir þau taka um nýtingu hennar (Kristín Norðdahl, 2005).

Leiðir leikskólans varðandi útikennslu
Leikskólinn Kátakot hefur sett sér það markmið að efla útiveru barnanna með útikennslu. Lagt er af stað með ákveðin verkefni í huga sem börnin vinna. Verkefnin fara eftir aldri og þroska barnanna og koma inná öll námsvið sem fram koma í Aðalnámskrá Leikskóla (1999). Allar ferðir eru skráðar í sérstaka dagbók, bæði myndrænt og skriflegt. Allar skráningar eru mikilvæg leið til þess að afla og geyma upplýsingar.

Meginmarkmið
• Að efla alhliða þroska barnanna.
• Að barnið kynnist nær umhverfi sínu og leikskólans.
• Að barnið kynnist náttúrunni og læri að bera virðingu fyrir henni.
• Að efla þol og úthald hjá barninu.

Undirmarkmið
• Að vinna með öll námsvið Aðalnámskrár leikskóla.
• Að börnin læri umferðarreglurnar.
• Að börnin rannsaki og skoði náttúruna.
• Að börnin njóti og nýti náttúruna allt árið um kring sem leiksvæði og efnivið til skapandi starfs og leikja.

Skipulag ferðanna og verkefna

Áður en haldið er af stað fara tvö börn saman og athuga veðrið og segja hinum hvernig best sé að klæða sig. Kennarinn fer yfir það með börnunum hvað á að gera í ferðinni og sér um að halda utan um alla skráningu.

Yngri hópurinn fer í vettvangsferðir í bænum sjálfum og í fjöruna. Ferðirnar eru skipulagðar með það markmið að efla og auka úthald barnanna og að verkefnin tengist beint við það sem þau eru að fást við í öðru starfi leikskólans.

Eldri hópurinn fer í skógarreitinn. Á leiðinni þangað förum við alltaf sömu leið. Á leiðinni eru ákveðnar stoppustöðvar þar sem þau börn sem fara hratt yfir bíða eftir þeim sem fara sér hægar. Á stoppustöðvunum eru stundum ákveðin verkefni eða spjall þar til við höldum áfram. Hluti af tímanum sem við eyðum í skóginum fer í frjálsan leik og hluti fer í fyrirfram ákveðna vinnu/leiki.